1972ല്‍ അച്യുതമേനോന്‍ മന്ത്രിസഭയുടെ കാലത്താണ് കേന്ദ്രം ആറളം ഫാം ഏറ്റെടുക്കുന്നത്. 2003ലെ മുത്തങ്ങ വെടിവെയ്പ്പിനെ തുടര്‍ന്നുണ്ടായ ചര്‍ച്ചകള്‍ക്കും കരാറുകള്‍ക്കും ശേഷമായിരുന്നു 7500 ഏക്കറോളം വരുന്ന ഫാം സംസ്ഥാന സര്‍ക്കാര്‍ ഏറ്റെടുത്ത് പകുതി ആദിവാസികള്‍ക്ക് വിതരണം ചെയ്യാമെന്ന് സമ്മതിച്ചത്. 2004ല്‍ ഭൂമി ഏറ്റെടുത്തെങ്കിലും വളരെ കുറച്ച് ആദിവാസികള്‍ക്കേ അത് വിതരണം ചെയ്യാനും വീട് വെച്ചു നല്‍കാനും ഇതുവരെ കഴിഞ്ഞിട്ടുള്ളു. 3500 കുടുംബങ്ങള്‍ക്ക് വിതരണം ചെയ്യുമെന്നാണ് സര്‍ക്കാര്‍ പറഞ്ഞതെങ്കിലും വെറും 640 കുടുംബങ്ങള്‍ക്കാണ് ഭൂമി വിതരണം ചെയ്തത്. ബാക്കി ഭൂരിഭാഗം കുടുംബങ്ങള്‍ക്കും ഇനിയും ഭൂമി ലഭിച്ചിട്ടില്ല. കുറച്ച് ഭൂമി തൊഴിലാളികള്‍ക്ക് വിതരണം ചെയ്തു. ഭൂമി കുടിയേറ്റക്കാര്‍ക്ക് നല്‍കാനും അതുവഴി ഭൂമി വിറ്റഴിക്കാനുമാണ് സര്‍ക്കാരുകള്‍ ശ്രമിക്കുന്നത്.